मोरङ, दशैं नजिकिँदै गर्दा मोरङका विभिन्न सीमा क्षेत्रबाट भन्सार छली गरी नेपाल भित्र्याउन लागिएका सामान बरामद हुने क्रम बढेको छ।
सशस्त्र प्रहरीले विभिन्न सीमा नाकाबाट भन्सार छली गरी ल्याइएका ३५ हजार ५ सय २५ रुपैयाँ बराबरका सामान बरामद गरेको छ।
सशस्त्र प्रहरी बल, नेपाल नम्बर ३ गण हेडक्वार्टर कंकालिनी मोरङ तथा सीमा सुरक्षा गुल्म हेडक्वार्टर रानीबाट खटिएको टोलीले नेपालतर्फ ल्याउँदै गरेको अवस्थामा ती सामान बरामद गरेको हो।
बरामद गरिएका सामानमा एउटा अटो, लत्ताकपडा तथा कस्मेटिक सामग्री रहेका छन्। भन्सार छली गरी ल्याइएको आशंकामा नियन्त्रणमा लिइएका सामान आवश्यक कारबाहीका लागि विराटनगर भन्सार कार्यालयमा बुझाइएको सशस्त्र प्रहरीले जनाएको छ।
दशैं-तिहारजस्ता ठूला चाडपर्व नजिकिँदै गर्दा सीमावर्ती क्षेत्रमा अवैध रूपमा सामान भित्र्याउने गतिविधि बढ्न थालेको सुरक्षा निकायको भनाइ छ। चाडपर्वलाई लक्षित गर्दै चिनी, दाललगायत खाद्यान्न सामग्रीदेखि खेलाउने पटाका तथा अन्य उपभोग्य वस्तुहरू भन्सार छली गरी नेपाल भित्र्याउने प्रयास हुने गरेको पाइएको छ।
विशेषगरी पूर्वी नेपालका विभिन्न सीमा नाकाबाट भारतबाट सामान ल्याएर नेपालमा बिक्री वितरण गर्ने उद्देश्यले भन्सार छली तथा तस्करीका गतिविधि हुने गरेको देखिन्छ।
चाडपर्वको समयमा उपभोग्य वस्तुको माग बढ्ने भएकाले सीमा क्षेत्रमा हुने यस्ता गतिविधि नियन्त्रण गर्न सुरक्षा निकायले निगरानी तथा चेकजाँचलाई तीव्र बनाएको जनाएको छ।
बरामद सामान विराटनगर भन्सार कार्यालयमा बुझाइएसँगै सम्बन्धित निकायबाट आवश्यक कानुनी तथा राजस्वसम्बन्धी प्रक्रिया अघि बढाइने जनाएको छ।
प्रतिक्रिया